Jeshi la Libya limefaulu kurejesha meli kwenye bandari ya Zawiya

meli ya Korea Kaskazini “Morning Glory”, iliyokua ikibeba mafuta kinyume cha sheria.

Jeshi nchini Libya limefanikiwa kuwakamata wafanyakazi wote wa meli ya Korea Kaskazini “Morning Glory” kufuatia usaidizi iliyoupata toka kwa wanajeshi wa Marekani ambao walivamia meli hiyo. 

Kukamatwa kwa wafanyakazi hawa kunakuja ikiwa yamepita majuma kadhaa toka serikali ya Libya itangaze na kuagiza vikosi vyake vya majini kushambulia meli hiyo iwapo ingekataa kusimama na kurejea kwenye bandari ya Tripoli inayosimamiwa na Serikali.

Meli hiyo ambayo imesheheni mafuta, ilifanikiwa kutoroka kwenye bandari ya Al-Sidri na kuelekea kwenye bahari ya kimataifa hali iliyosababisha kuondolewa madarakani kwa waziri mkuu Ali Zeidan kabla ya wanajeshi wa Marekani kuingilia kati.

Jeshi la majini nchini Libya, ambalo limekua likishikilia meli hio tangu jumamosi, limeikabidhi polisi ya uhalifu juzi jumapili wafanyakazi 21 wa meli hio, ambao ni kutoka mataifa mbalimbali, wakiwemo raia watatu wa Libya, ambao walikua ndani ya meli.

Kwa mujibu wa msemaji wa muendesha mashitaka mkuu wa Libya, al-Seddik al-Sour, nahodha ma meli na raia watatu kutoka Libya waliyokua ndani ya meli wamehojiwa jana.

Washington ilifahamisha jana kwamba ilikabidhi vyombo vya usalama vya Libya meli hio ambayo ilikua ikibeba mafuta yaliyonunuliwa kinyume cha sheria kwa waasi waliyojitenga wa mashariki mwa Libya.

Kulingana na taarifa ziliyotolewa na jeshi la majini la Libya, meli imewasili jana kwenye ufukwe wa bahari mjini Tripoli, kabla ya kujielekeza kwenye bandari ya Zawiya, kilomita 50 magharibi ya mji ili kupakua mzigo iliyokua inabeba.