BUNGE LAMTUHUMU PINDA KWA RUSHWA

Waziri Mkuu wa Tanzania Mizengo Kayanza Pinda na baadhi ya mawaziri waandamizi wa serikali ya nchi hiyo wamekumbwa na tuhuma za kuwahonga baadhi ya wajumbe wa bunge maalumu la katiba kutoka kundi la watu 201 ili waunge mkono msimamo wa serikali mbili.

 Tuhuma hizo nzito zilitolewa jana bungeni na mjumbe Ezekiel Wenje, kauli ambayo ilichafua hali ya hewa kwenye bunge hilo la katiba.

 Wenje aliwatuhumu pia, Mawaziri Profesa Jumanne Maghembe, Dakta Shukuru Kawambwa na Gaudensia Kabaka kuwa wametoa rushwa za vyakula na vinywaji kwa wajumbe hao. 

Wakati huohuo, Makamu wa Pili wa Rais wa Serikali ya Mapinduzi ya Zanzibar Balozi Seif Idd ametangaza vita kwa mtu yeyote anayepanga njama za kuvuruga mchakato wa rasimu ya pili ya katiba. 

Balozi Seif Iddi aidha ameibeza kauli iliyotolewa juzi na Makamu wa Kwanza wa Rais Maalim Seif Sharrif Hamad kwenye viwanja vya kibandamaiti na kusema kwamba kiongozi huyo hana uwezo wa kufanya chochote visiwani Zanzibar. 

Balozi Iddi ameonya kuwa, hali ikiendelea hivyo Serikali ya Mapinduzi haitasita kuwashughulikia watu wote wa aina hiyo.