Mgomo matumizi ya EFD waendelea

Wakazi wa jiji la Dar es Salaam wakipita kandokando ya maduka ya bidhaa mbalimbali  yaliyoko Kariakoo ambayo yameendelea kufungwa  jana kutokana na mgomo wa wafanyabiashara kupinga mashine zakielektroniki  (EFD’s). Picha na Venance Nestory 

Na Waandishi Wetu, Mwananchi

Sakata la wafanyabishara kuendelea kugomea mashine za elektroniki, limechukua sura mpya baada ya maeneo mbalimbali kutangaza kuzikataa.

 

Juzi wafanyabiashara waliungana na kumtaka Rais Kikwete kuingilia kati hasa kuhusiana na bei kubwa ya kifaa hicho.

Tayari Mamlaka ya Mapato Tanzania(TRA)imewaonya watu wanaowatisha wafanyabiashara hata kufunga maduka yao, kuwa kufanya hivyo ni kosa la jinai na hatua kali za kisheria zitachukuliwa kwa wote watakaokaidi.

Imebainisha taarifa hiyo kuwa TRA inasikitishwa na kinachotokea hivi sasa kwani matumizi ya mashine hizo yalipitishwa kisheria na Bunge la Tanzania mwaka 2011 na suala hilo lilitolewa ufafanuzi na Makamu wa Rais, Dk Gharib Bilal Novemba mwaka jana.

Wengine waliozungumzia sakata hilo ni, Rais Jakaya Kikwete katika hotuba yake ya mwishoni mwa Machi 2011 pamoja na Waziri Mkuu, Mizengo Pinda.

TRA imebainisha kuwa msimamo wa Serikali unafahamika na Waziri wa Fedha, Saada Mkuya Salum alisisitiza kuwa suala la matumizi ya mashine hizo ni la kisheria na wafanyabiashara hao waliongezewa muda mara tatu wa kununua mashine hizo.

Wakati hayo yakiendelea, Chama cha Wafanyabiashara wenye Viwanda na Kilimo (TCCIA),kimeitaka Serikali kusitisha matumizi ya mashine hizo na kuanza kushughulikia changamoto zilizotokana na mfumo huo.

Akizungumza wakati wa mkutano na waandishi wa habari uliofanyika jijini jana, Rais wa chama hicho, Mhandisi Peter Chisawillo alisema, Serikali inapaswa si kuwa sikivu pekee bali pia kushughulikia kero zinazowakabili wafanyabiashara.

Dar es Salaam

Mgomo wa wafanyabiashara umeingia siku ya nne jana na vikao baina ya Wizara, Mamlaka ya Mapato (TRA) na wadau wengine vilikuwa vinaendelea bila kuwapo kwa dalili za mwafaka kupatikana.

Naye Kaimu Mkurugenzi wa Huduma na Elimu kwa Mlipa Kodi, Diana Masalla, alisema utaratibu wa kutumia mashine utaendelea hadi hapo, Wizara ya Biashara na TRA watakapotangaza vinginevyo.