"Mapendekezo ya Misri hayakidhi matakwa yetu"

Usama Hamdan, Mkuu wa Mahusiano ya Nje wa Harakati ya Muqawama wa Kiislamu ya Palestina HAMAS amesema mapendekezo yaliyotolewa na Misri katika mazungumzo ya Cairo hayakidhi matakwa ya Wapalestina.

Kiongozi huyo mwandamizi wa HAMAS amesisitiza kuwa utawala wa Kizayuni hauna chaguo jengine ghairi ya moja kati ya mawili; ima kukubali masharti ya Palestina au kukabiliana na vita vya msuguano vya muda mrefu. 

Hamdan, ambaye alikuwa akihutubia mkutano wa kuiunga mkono Gaza uliofanyika mjini Khartoum, Sudan, ameongeza kuwa kuna mikakati inayotekelezwa katika mazungumzo ya usitishaji vita ya Cairo kwa lengo la kuusamabaratisha umoja katika ujumbe wa Wapalestina katika mazungumzo hayo. 

Katika upande mwengine Azzam al Ahmad, mkuu wa Palestina katika mazungumzo yasiyo ya ana kwa ana na utawala wa Kizayuni wa Israel amesisitiza kwamba haitowezekana viongozi wa Palestina kukubali maafikiano yoyote ambayo hayatodhamini haki na malengo ya taifa la Palestina. 

Hii ni katika hali ambayo serikali ya Misri imezikabidhi pande mbili za Palestina na Israel mapendekezo yake rasmi ya usitishaji vita huko Gaza na kuutaka kila upande utoe msimamo wake kuhusiana na mapendekezo hayo. 

Hivi sasa usitishaji vita wa muda wa siku tano unaendelea huko Gaza ambao ulianza kutekelezwa siku ya Alkhamisi iliyopita.