Al: Askari wa Israel wanatenda jinai za kivita Palestina

Shirika la Kutetea Haki za Binadamu la Amnesty International limetangaza kuwa,  majeshi ya utawala wa Kizayuni wa Israel yanatenda jinai za kivita kwa kuwauwa na kuwajeruhi wananchi wa Palestina walioko katika eneo la Ukingo wa Magharibi mwa Mto Jordan. 

Philip Luther, Mkurugenzi wa Kanda ya Mashariki ya Kati na Kaskazini mwa Afrika wa shirika hilo la kimataifa amesaema kuwa, kuna ushahidi wa kutosha unaoonyesha kwamba majeshi ya Israel yametekeleza mauaji dhidi ya wananchi wasio na hatia wa Kipalestina katika eneo hilo. 

 Shirika la Amnesty International limeeleza kuwa, wanajeshi wa Israel katika kipindi cha miaka mitatu iliyopita wamewauwa makumi ya wananchi wa Palestina wasio na hatia. 

Ripoti hiyo yenye kurasa 87 imeeleza kuwa, wanajeshi wa Israel licha ya kutumia silaha za moto na nguvu kupita kiasi, yamewauwa wananchi 45 wa Kipalestina na kuwajeruhi maelfu ya wengine. 

Shirika la Amnesty International limezitaka nchi za Marekani, Umoja wa Ulaya, na wanachama wengine wa Jamii ya Kimataifa waache kupeleka silaha na zana za kijeshi huko Israel, ili kuushinikiza utawala huo uache kuwauwa Wapalestina.