Ukuta waua mtoto

MTOTO Ismail Yusuph (2) amefariki dunia juzi baada ya kuangukiwa na ukuta wa nyumba.

Tukio hilo lilitokea juzi saa 6 mchana maeneo ya Kondo Beach, Kinondoni, jijini Dar es Salaam alipokuwa akicheza na wenzake kandokando ya nyumba hiyo. Maiti imehifadhiwa hospitali ya Mwananyamala.

katika tukio jingine, mwanaume asiyefahamika anayekadiriwa  kuwa na miaka kati ya 30 hadi 35, amekufa maji baada ya kutumbukia kwenye mto, maeneo ya Temeke kwa Sokota Chang’ombe.

Kamanda wa Polisi Mkoa wa Temeke, Englibert Kiondo, alisema mwanaume huyo alitumbukia katika mto huo alipokuwa akiendesha baiskeli, hivyo kusombwa na maji yaliyokuwa yakienda kasi kutokana na mvua zilizokuwa zikinyesha.

Kamanda Kiondo alisema maiti ya mwanaume huyo ilipatikana maeneo ya Kiwanda cha Bia cha Serengeti kwenye mfereji wa maji. Maiti imehifadhiwa Hospitali ya Temeke.