TRA yakunjua yawafikisha mahakamani waliozigomea EFD

Mamlaka ya Mapato Tanzania (TRA) Mkoa wa Singida imewapandisha kizimbani wafanyabiashara wanne wa Mjini Singida kwa makosa mbalimbali, ikiwemo kutotumia kwa makusudi mashine za kielekroniki (EFD) kukusanyia kodi, huku wakijua wazi ni kosa kisheria.

Shtaka lingine linalowakabili wafanyabiashara hao akiwemo Sabra Mohammed na Khalfani Juma ni kushindwa kulipa kodi ya VAT kwa makusudi, katika vipindi tofauti kati ya Februari mwaka jana na Januari mwaka huu, jambo ambalo ni kinyume cha sheria ya TRA, kifungu namba 148 cha mwaka 2008.

Mbele ya Hakimu Mfawidhi wa Mahakama ya Mkoa Singida Joyce Minde, ilidaiwa na Afisa Sheria Mwandamizi wa TRA Kanda ya Kaskazini Geva Masele kuwa, wakati washtakiwa wakiendelea na biashara zao katika eneo la Barabara ya Karume Mjini Singida, walifanya makosa hayo na hivyo kuikosesha Serikali mapato.

Hata hivyo washtakiwa wote walikana mashitaka yao na wapo nje kwa dhamana ya Sh2 milioni kila mmoja kuwa na mdhamini mmoja na shauri hilo litatajwa tena februari 26 mwaka huu.

Wakati huohuo Robert Mkoma anayefanya biashara katika Barabara ya Lumumba, Singida amefikishwa mbele ya Hakimu Mkazi Wilaya Singida Flora Ndale kwa mashtaka ya kushindwa kulipa kodi na kutotumia mashine ya kielekroniki (EFD) kwa makusudi, jambo ambalo ni kosa kisheria.

Katika shauri lingine, TRA imempandisha kizimbani Rufina Kundya mbele ya hakimu Asha Mwetindwa wa Mahakama ya Hakimu Mkazi Mjini Singida kwa kosa la kushindwa kulipa kodi na kutotumia kwa makusudi mashine ya kieletroniki (EFD), hali ambayo anaikosesha serikali mapato.