Tume yafichua siri Mawaziri wa JPM

KAMISHNA wa Tume ya Maadili ya Viongozi wa Utumishi wa Umma, Jaji mstaafu Salome Kaganda, amesema amewashtaki baa­dhi ya wateule wa Rais Dkt. John Magufuli katika nafasi za Mawaziri na Manaibu Mawaziri kwa Waziri Mkuu, Kassim Majaliwa.

Wateule hao ni wale ambao hadi sasa hawajajaza fomu za kiapo cha hati ya maadili ya vi­ongozi kama sheria inavyotaka na kuahidi kumpatia Majaliwa majina ya viongozi hao.

Jaji Kaganda aliyasema hayo Dar es Salaam jana katika ufunguzi wa mafunzo maalumu yaliyoandaliwa na ofisi yake kwa Mawaziri na Manaibu Mawaziri ili kuwakumbusha wajibu wa kuzingatia maadili ya utumishi wa umma.

Katika utangulizi wa hotuba yake mbele ya waziri mkuu alisema kuwa kuna baadhi ya mawaziri na manaibu wao hadi leo wameshindwa kujaza fomu za kiapo cha maadili ya utumi­shi wa umma kwa viongozi wa umma bila kuwepo sababu zozote za msingi hivyo alibaini­sha wazi kuwa majina hayo atakabidhi kwa waziri mkuu.

"Sijajuwa kwanini hadi leo mawaziri hawa hawakujaza fomu za uadilifu nakuhoji kuwa kama rais mwenyewe amejaza na hata rais aliyemaliza muda wake alifanya hivi, sheria ina­hitaji kila kiongozi wa umma kujaza fomu hizi,"alisema.

Akizungumzia sheria ya maadili ya utumishi wa umma kwa viongozi alisema kuwa inaelekeza kila kiongozi wa umma kutangaza mali zake wa­ziwazi hivyo mafunzo hayo ya­nalenga kuwaongezea uwezo viongozi wa utumishi wa umma na ili mambo yaende lazima viongozi wakiwamo mawaziri kuzingatia maadili ya utumishi wa umma.

Pia Jaji Kaganda aliwataka mawaziri hao kusoma viapo vyao vya ahadi ya uadilifu na ku­weka katika ofisi zao ili kuweza kukumbuka hususani pindi wanapokuwa maofisini kwao ili kuepuka kutumia vibaya nafasi zao.

Aidha akizungumzia chan­gamoto wanazokutana nazo kama Ofisi alisema kuwa tatizo kubwa ni ufinyu wa rasilimali fedha, vifaa, pamoja na ofisi za kufanyia kazi na kudai hata wakati mwingine siri mbalimbali za ofisi zinavuja kutokana na ufinyu wa rasilimali fedha hatua inayosababisha wahisani kutoa fedha zao ambapo mwisho wa siku na wenyewe wanaingia kwenye vikao muhimu vyenye maslahi ya taifa.

"Naiomba Serikali kutu­wezesha ili tuweze kufanya kazi kwa uadilifu mkubwa na­kwamba kukosekana kwa rasilimali fedha kunasababisha tukose hata kufanya kazi za kiuchunguzi zaidi, lakini tuki­wezeshwa tutafanya kazi nzuri zaidi,"alisema.

Kwa upande wake Waziri Mkuu Majaliwa akizungumza katika mafunzo hayo yaliyo­fanyika Ikulu Dar es Salaam alitoa wito kwa mawaziri na kwa watumishi wa umma na sekta binafsi kwamba kila mtu kwa nafasi yake atimize ahadi zake na kuzizingatia na hiyo itasaidia kujenga uwajibikaji, uadilifu na utiifu katika Serikali wanayoiongoza.

Alisema ni lazima viongozi wakubali kujenga tabia ya kuz­ingatia maadili kama heshima pekee ambayo wananchi wan­getamani ionekane kwa kila kiongozi na mtendaji aliyepewa dhamana, maadili ni tunu am­bayo inaweza kumtofautisha mtu na mtu na yanachochea kujenga tabia ya upendo, umo­ja na mshikamano, hali ambayo inaleta maendeleo katika taifa.

"Nikweli kwamba wananchi wanachukia rushwa na ufisadi na wamechoshwa na vitendo hivyo hawafurahishwi kabisa na vitendo hivi vya rushwa na ufisadi vinavyoendelea hapa nchini, vitendo ambavyo vinawanyima haki zao na kuitia hasara ya mamilioni ya fedha Serikali, fedha ambazo zingeweza kutumika kwa ajili ya kutekeleza miradi ya maendeleo yao,"alisema Majaliwa.

Nakuongeza "tatizo hilo linaweza kutoweka ama kupungua kama tutazingatia sheria ya maadili kwa ujumla wake na kama tutaweka kipaumbele na umuhimu unaostahili wa kupambana na rushwa na ufisadi katika nchi yetu,"alisisitiza.

Pia aliongeza kuwa Rais Dkt. Magufuli katika hotuba yake ya kuzindua bunge mjini Dodoma alisisitiza kuhusu mapambano dhidi ya rushwa na ufisadi ambavyo tiba yake kuu ni uzingatiaji wa sheria ya maadili katika nyanja zote.

Majaliwa pia alibainisha maeneo ambayo Rais Magufuli aliyaita kero kwa wananchi muda wote wakati wa kampeni za uchaguzi kuwa ni pamoja na ucheleweshaji wa utoaji huduma, upendeleo, ubinafsi, rushwa na ufisadi, pamoja na matumizi mabaya ya madaraka.

"Binafsi Februari, 2016 nilikabidhiwa rasmi hati ya uadilifu ambayo nadhani ni ile baadhi ya waandishi waliita "Integrity Pledge" ambayo nilisaini hapo awali ambapo mengi yaliyopo katika hati ile nadhani yanashabihiana, naamini kuwa kila mmoja wetu aki tekeleza kwa vitendo ahadi zile na kiapo kile tutakuwa tunatimiza nadhiri yetu kwa wananchi waliotuchagua,"alisema Majaliwa.

Aliongeza kuwa sheria ya maadili imeweka masharti maalum kwa mawaziri, naibu mawaziri na wakuu wa mikoa ambapo katika sehemu ya nne kifungu cha 16,17 cha sheria hiyo kimeweka masharti ya ziada na ambayo yamezingatia katiba ya Jamhuri ya Muungano wa Tanzania (1977).

Alisema katika kifungu cha 17 kinasema kuwa waziri hatakiwi kufanya jambo lolote linalopingana na dhana na uwajibikaji wapamoja wa mawaziri kuhusu sera ya serikali na uendeshaji wa shughuli zake na hataruhusiwa kupinga hadharani au kujiondoa yeye binafsi katika maamuzi yoyote yanayofanywa na baraza la mawaziri.

Kutoa hadharani matusi ya kumkosoa kiongozi mwenzake mwenye madaraka ya uwaziri na kutoa nje taarifa zisizoruhusiwa za mijadala na maamuzi au nyaraka za baraza la mawaziri.