Polisi wang’ang’ania kompyuta ya Mansour

 

Aliyewahi kuwa Waziri wa SMZ, Mansour Yusuph Himid ambaye alikamatwa na silaha mbili za moto na risasi 412, nyumbani kwake Chukwani hivi karibuni.

Jeshi la Polisi Zanzibar linaendelea kuishikilia kompyuta ndogo (laptop) ya waziri wa zamani wa Serikali ya Mapinduzi Zanzibar (SMZ), Mansour Yussuf Himid aliyekamatwa na kufunguliwa mashtaka ya kupatikana na bunduki na risasi 407 kinyume na sheria.

Naibu Mkurugenzi wa Upelelezi wa Makosa ya Jinai Zanzibar, Salum Msangi alisema laptop hiyo iko mikononi mwa polisi tangu ilipokamatwa Agosti 2, mwaka huu.

Msangi alisema polisi inaendelea kuifanyia upekuzi ili kujua yaliyomo ndani yake na imehifadhi vitu vya aina gani na iwapo hakutakuwa na vitu vya uvunjifu wa sheria itarejeshwa kwa mhusika.

Alisema endapo watabaini kuwapo kwa vitu vyovyote vya uvunjifu wa sheria itatumika kama kielelezo na kwamba kazi ya kuipekua inaendelea.

“Ni kweli laptop tunaendelea kuifanyia uchunguzi bado ni mapema kuwaeleza nini tumekiona na hakuna sababu ya kueleza hivi sasa kwa kuwa kazi hiyo bado haijakamilika,” alisema Msangi.

Hata hivyo, alisema hatua za awali za uchunguzi zimeonyesha kuna mambo alikuwa akiyatuma kwenye mitandao ya kijamii na kushiriki hatua mbalimbali za mijadala inayohusu siasa na maendeleo ya jamii.

Alisema siyo kosa mtu kushiriki na kutoa maoni katika mitandao ya kijamii lakini kuna mambo zaidi ya hapo yanahitaji kuchunguzwa.

Mbali na hilo pia walifanya upekuzi katika nyumba nyingine ya waziri huyo wa zamani iliyopo katika Kijiji cha Kiboje, kilomita 12 kutoka Mji Mkongwe, Zanzibar.