Mpango wa mazungumzo wa US wakosolewa vikali

Khatibu wa Masjidul Aqswa Palestina amelaani vikali mipango ya Marekani kuhusiana na mazungumzo eti ya amani kati ya Mamlaka ya Ndani ya Palestina na utawala haramu wa Israel. 

Sheikh Akramah Sabri amesema kuwa, mipango inayopendekezwa na Marekani kwa ajili ya mazungumzo ya mapatano kati ya Mamlaka ya Ndani ya Palestina na Israel inalenga kupora ardhi za Wapalestina na kujengwa vitongoji vya walowezi wa Kiyahudi.

Khatibu wa Masjidul Aqswa ameweka wazi kwa kusema kwamba, mapendekezo ya John Kerry, Waziri wa Mashauri ya Kigeni wa Marekani hayana natija na ni mapendekezo ambayo hayana faida yoyote kwa wananchi madhulumu wa Palestina. 

Amesema, taifa la Palestina katu halikubali mapendekezo kama hayo kwani ni ufumbuzi wa kadhia ya Palestina kupitia njia za haramu na batili. Wakati huo huo, Khalid Mash'al, 

Mkuu wa Ofisi ya Kisiasa ya Harakati ya Mapambano ya Kiislamu ya Palestina HAMAS, amemtaka Mahmoud Abbas, Rais wa Mamlaka ya Ndani ya Palestina kuacha kufanya mazungumzo na utawala wa Kizayuni wa Israel akisema kuwa, mazungumzo hayo hayana faida yoyote.