Kesi Ya Sheikh Ponda Kuanza 18 Nov

Mahakama Kuu Kanda ya Dar es Salaam, imepanga kuanza kusikiliza maombi ya marejeo yaliyowasilishwa na Katibu wa Jumuiya na Taasisi za Kiislamu Tanzania, Sheikh Issa Ponda.
 

Maombi hayo ya marejeo yanatarajiwa kuanza kusikilizwa Novemba 18, mwaka huu na Jaji Rose Temba.

Sheikh Ponda aliwasilisha maombi hayo baada kutoridhika na uamuzi uliotolewa na Mahakama ya Hakimu Mkazi Morogoro wa kukataa ombi lake la kulifuta shitaka la kuwa yeye alivunja masharti ya kifungo cha nje kilichotolewa na Mahakama ya Hakimu Mkazi Kisutu Mei 9, mwaka 2013.

Hukumu hiyo ilikuwa ikitamka awe akihubiri amani.

Kwa mujibu wa Mahakama ya Hakimu Mkazi Morogoro, jalada la kesi hiyo, lilipelekwa katika Mahakama Kuu tangu Oktoba mwaka huu na kwa upande wao itakuwa ikitajwa wakati wakisubiri matokeo ya Mhakama Kuu.

Kesi ilikuwa katika hatua ya kuanza kusikilizwa kwa upande wa mashtaka kupeleka mashahidi wao.

Katika kesi hiyo, inayoendeshwa na Wakili wa Serikali Mwandamizi, Benard Kongola na kusikilizwa na Hakimu Richard Kabate , Sheikh Ponda anadaiwa kutenda makosa ya uchochezi Agosti 10, mwaka 2013.

Inadaiwa kuwa alifanya hivyo katika maeneo ya Kiwanja cha Ndege cha Morogoro.

Inadaiwa kuwa Sheikh Ponda alialikwa kutoa maelezo machache kwenye Kongamano la Eid lililoandaliwa na Umoja wa Wahadhiri wa Mkoa wa Morogoro (Uwamo).

Inadaiwa kuwa akiwa hapo alitamka maneno: “Ndugu Waislamu, msikubali uundwaji wa kamati za ulinzi na usalama za misikiti kwani kamati hizo zimeundwa na Baraza la Waislamu Tanzania (Bakwata), ambao ni vibaraka wa CCM na Serikali na kama watajitokeza kwenu watu hao na kujitambulisha kwamba wao ni kamati za ulinzi na usalama za misikiti, fungeni milango na madirisha ya misikiti yenu na muwapige sana.”

Mamlaka ya Serikali zinadai kuwa maneno hayo ni ya uchochezi na ni kosa kisheria.

Pia Sheikh Ponda anadaiwa kuwashawishi wafuasi wake kutenda kosa la jinai kwa kuwaambia: Serikali ilipeleka Jeshi Mtwara kushughulikia suala la vurugu iliyotokana na gesi kwa kuwaua, kuwabaka na kuwatesa wananchi kwa sababu asilimia 90 ya wakazi wake ni Waislamu.